今晚清涼, 家人都外出。難得一夜清靜, 我做了簡單 (但份量太多) 的晚餐, 趕緊把珍藏廣東南音播放。今晚有時間, 聽完客途秋恨, 仲可以細聽雙星恨, 原來好正。

<<雙星恨>>
涼風陣陣，七月初秋，
荏苒迢光又一個年頭，爽霎秋風涼透袖，
牛郎此際步過山丘，免令織女賢妻在河 邊等候。
手執繩索牽緊隻耕牛，寶貴光陰言非謬，
心如煎急快把身抽，無心觀花和看柳，
一年一度今晚會溫柔。
呢隻耕牛好似將計扭，牽極佢都唔走確令人嬲，
我叫 句牛哥你咪將氣鬥，我地長期相處共你有乜冤仇。
此際隻耕牛果然飛快走，好似知人意思把眼來瞅，
牛郎個陣歡喜透，只見銀河在望不禁喜上心頭。

歌詞係咪好過癮呢?

催人更鼓二更初，可恨身無羽翼飛渡銀河，
今晚七夕良宵愁難過，個織女亦係恨怨多，
愁對布機眉雙 鎖。
眉雙鎖，只為玉皇大帝有把我折磨，切齒咬牙滿胸怒火，
可恨玉皇無理把暴理苛，皇母強橫施夏楚，
用花針來劃呢一道銀河，大好家庭畀佢攪禍，
那堪回首記當初，
個陣我地女織男耕本來好妥，豐衣足食樂融和。
愈想愈思愁苦楚，良宵七夕更惹愁多。
樵鼓三更經打過，牛郎曉首望過對河，
只見織女已經橋坢坐，隔河隱約叫 一句哥，
玉帝專權如枷鎖，難打破，
愁城一座恨隔銀河

仲反帝反封建添. …

牛郎此際，喚句嬌妻，妻你為郎憔悴瘦減腰圍，
可恨罪魁禍首係玉皇大帝，逼人咄咄濫用權威，
致令月老無由把紅絲繫，我地銀河相隔終日淚悲啼。
織女個時心苦翳，滿懷痛苦珠淚橫揮，
頓足捶胸罵句玉皇大帝，心如蛇蝎把人噬，
辣手橫揮多慘厲，破壞我家庭幸福立 心虧，
只許七夕相逢真專制，忍令男情女愛恨海長迷。
此際牛郎將妻安慰，妻呀你心頭大石可以暫拋低，
我地今宵相莫把來宵計，
你睇下凡間煙火好似大霧迷迷，
人 間七夕多華麗，萬家燈火奪目光輝，
深閨少女齊下跪，誠心祝願把我地恭維，
佢地亦戥我兩人真唔抵，畀銀河相隔真係太悲淒，
七夕佳期今晚係，所以人間紀念千載 未忘遺，
織女聞言心快慰，的確係人間溫暖非是無稽，
我地致勵留傳人間世，使我萬分感銘記在心黎。
個陣織女牛郎除盡心頭翳，隔河談笑重手不停揮，
忽見喜鵲成群飛來將橋砌，張開雙翼排得整整齊齊，
只見銀河波濤洶湧勢，但係鵲橋高架似雲梯，
牛郎立即過橋無阻滯，同傾腑肺，
牛郎織女個陣玉手相攜

一個千年哀豔、搏得萬艾同悲的故事, 竟然可有此一twist, 既是叫人嘆為觀止, 也叫人心頭一暖。
咦, 許氏兄弟當年大受歡迎的綜藝節目<<雙星報喜>>一名, 其實係咪向呢首南音「致敬」的呢?